كشفت الفنانة حورية فرغلي عن تفاصيل ارتباطها بالفنان الراحل هيثم أحمد زكي قائلة: «كانت تربطني علاقة عاطفية مع هيثم أحمد زكي».

وأوضحت فرغلي خلال لقائها ببرنامج «حبر سري» الذي يذاع على شاشة فضائية «القاهرة والناس»: «هيثم قابلته في بروفات فيلم كف القمر ودوري كان معاه هو، اتقربنا أوي من بعض هو كان بيصعب عليا أوي لأنه كان دايما لوحده، كان ممكن تلاقيه قاعد لوحده وعينيه مدمعة، فحبيت إني أتقرب منه هو كان بالنسبة لي زميل عزيز وأكتر شوية».

وأضافت: «لكن هو ارتبط بيا عاطفيا أكتر، أنا حسيت من ناحيته بحاجة ولكن مكنش ينفع، أنا كنت أكبر منه بـ6 سنين، وكان آخر مرة كلمته فيها كانت خناقة وقالي باي باي يا طنط، من بعدها مكلمتهوش تاني، أنا بسبب تجربة هيثم دي مستحيل ارتبط بحد أصغر مني بيوم».

وأشارت الفنانة إلى مصدر ثروتها، موضحة وفقا لما ورد هنا: «أنها لم تحقق ثروة مالية من عملها الفني رغم أنها كانت تحصل على أجور مرتفعة»، مضيفة: «أنا عندي ثروة من أهلي والفلوس اللي بتيجي من التمثيل بصرفها على شغلي من شراء إكسسوارات وملابس، وبحب أصرف على شغلي لو منتج مش هيصرف، وأنا معملتش فلوس عشان مسرفة».